في البدء كانت الكلمة: #تسقط_بس
إلى: الشفاه التي أبدعت ب {تسقط بس}
ال...لا...معقول!
معقول؟!
بعد كل الكلام
عن الحرام
والدم المسفوح ...
والتعدي على البيوت من سطوح لسطوح
والقناة الناكرة للخبر والقول
و (المتَتَشر) بالعضل كسَّر عُضام الحيطة
ووسط (الزيطة)،
سَحَق البراءة ... وكبد إنفطر، وبِرِش إنفرَش
أتاريهُ حي الغول!
معقول؟!
بعد كل الحصل والما حصل
يبدأ فيلم نفس الفيلم
نفس الرماد والسَجم
جعجع مَمضمَض بكل أنواع (التِفِل)!
يا أخواتي ... دي مصيبة ... وجلل
مكتوب على سيماهم ... الحُكُم يا بالرقيص يا بالرقيص
تَلبَس (بِديلة) ... تَلبَس (على الله) ... تَلبَس قميص
بقع الدماء فيهم بَلَل
ألوانها فِركَة قَرمَصيص
هذا الدُهُّل ... ذاك النذِل
الخَتاهو والقَلعَو والخَتاهو وإترَجاهو
خَلاهو، كأن ما ليه حَل!
والناقة لا ليهم ولا ليهم جمل!
في ما حصل!
معقول؟!
الصاج (طَايوقو) ساح
كيف (العُواسَة) والحطب لهلب وناح
ريحة المُلاح فاحَت
فيها الفَرَك من فَرَك
الطلع فوق والبَرك
والرُكب ساحَت
والعِمَم شاخت
والعيون شافت
منو النَصب الشرك؟
شرك أو ما شرك
سُوطُوا ذي ما تسُوطُوا ، ساكِينكُم سَك!
معقول؟!
نَسكُت يا (طواري)
الطواري للمجاري!
لو سَكتَت (قطط) كافوري؟
بتسكُتي يا براري
بتسكُتي يا حواري
بتكبُتي يا ضَهاري
بتسكُت؟
يا شَايت البُمبان في الحِلّة قُون مَهَر وهدية
للبنيّة الفَنجرية
يوم الخلاص قَرَّب حسب مِقداري
يوم الخلاص قَرَّب حسب مِقداري
كريمان زلفو
الفاتح من مارس 2019م
الزيطة: الفوضى مع الضجة
بِديلة: تصغير بدلة
على الله: لبسة شعبية
فِركَة قَرمصيص: غطاء للعروس .. أحمر اللون
الطَايوق: نخاع يمسح به صاج الكِسرة كي لا تلتصق الكِسرة بالصاج
No comments:
Post a Comment