في البدء كانت الكلمة: #تسقط_بس
إلى: الشفاه التي أبدعت ب {تسقط بس}
المجلس الشيطاني
بدايتك كِذب
حبلهُ القصير صعب يِنكرِب
نهايتك خيانة قِسمة وضرِب
يا عارنا...زِح فَضِّي الدَرِب
ويا المِتلِّب
مش عَجَب
قبل ما تفرح قلوبنا وتهِب
تِدّاول "الميديا" خَشُم بيتك طرِب،
والرُتبة الصغيرة وقَف إِنتصب!
سِيب الرُتَب
تعرف تباشير الغضب؟
عُكاز البشير لاحت...أحذر غضب
طَنِّشنا!
شَكَلَك مُهذّب
راكِز، محترم، أَدِب
وسط الجلب
نسينا "قوقل" ود لهب!
ويا للكِذب!
جَرجَر صِباك، قدامك، قَفاك
- شي (للفُور أنا رب)،
- شي ترتيب إرتزاق، (ما هُمْ جَرَب)!
...وما أعظم المدسوس
أخاف...يكون قِلة أدب
والكباشي
آه من الكباشي!
خَتَوك للبشاشة ووِش قَبَاحَة
مرة ماشِي،
بكلام إحتقار للكبار والصغار
تسكت كلاباً عن نِباحا
ومرة هَاشّي وبَاشّي
سؤال عبيط هل هِظار:
(الدولة العميقة ساحة،
كُلّنا بنقلَع جذورها...ماشي)؟
يا فاشي!
إنتَ من وين؟ من أي دار؟
عيب تنسلخ من أصولك بوقاحة
الكذب عندك!
صراحة!
نلعَنَك كلما لاحت خوازيق
يا بشير الشر يا فتنة وحريق
خازوقاً مسمّر في الطريق
كان خَليتهُ فتنة!
كان عاندته فتنة!
قاعِد على جبلين واحد دهب
والتاني الجماجم...
كيف بينوم الليل؟ كيف يطيق؟
كذبتين أحلاهما مُر
هل بَساطة أم قِناعاً ليك صفيق؟
والخطير!
القال في المقال "المايك" يطير:
(لو تعَرفوا من أنا..
بَسْ ما بتعرفوا...أخطر كَتير)
ياحِليلَك يا غرير
"السايكو"...الخُسِف بيهُ البشير
كذبِك تَصدِّقهُ إنتَ
ومعاك رئيسك يا عَوير
قال عالي عسكري وانتقالي
كل ما في البلد لي حلالي
قلنا: (هل يستقيم للص ضلالي
وفوق ضلاله كذِبْ التلالِ
يحكم بلد أصبح بيلالي)
"وهج الشباب خَجّل هِلالي"
قال البلد:
(لأ!
المقام اللِيلَك في مجالي
تحرِس وتسهر شان عيالي)
كريمان زلفو
١٣ مايو ٢٠١٩م
No comments:
Post a Comment