في البدء كانت الكلمة: #تسقط_بس
إلى: الشفاه التي أبدعت ب {تسقط بس}
#٢٨ رمضان١٤١٠ هجري_٢٩ رمضان ١٤٤٠ هجري
يحرِق جَنَاك
عن كل قطرة دم
سالت على التُربة
الأصبحت خصبة
ساقيها ما هَمْهمْ
وشال الهَم
وما بِندم
ومُتقدِّم
ماشي الجنة مُتهندِّم
يحرِق ضَناك
يحرِق جنودك
يحرِق بشيرك ومن حواك
يحرِق الحاملاهو مَرَتَك في حَشاها
وأبوك معاها
يحرِق حَشا أُمَك، ملعون جَناها
يدفع فداها
عن كل وتد لخيمة هَبشَا المعاك
عن كل سِكليبة لثكلى
عن كل رَكلة
عن كل جثة بغُطاها
يحرِق جَناك
ذرية جَناك
والمِتابعَك مَرشي راكع لرضاك
معقول
يا دَلدُول
تطارد للتفلُت وانت كالمسطول!
مِهدِّل لرقيبتك خوف من المهبول
هَزْهِزْ كَتافينَك (حَقَ ليك القُول)
يا حواء يا طَقطَاقة سوّي ليهُ "اللَّول"
يحرِق جَناك
وارث أذاك
ويسِد طريق الخير أمامك ومن وراك
عيدك سَوَاد
عيدك رمَاد
عيدنا للحِد والفُراد
زي جِمالَك حَىَّ على القياد
يوم تَشَمشِم في البلاد
وين المزاد
الكلب لو شِبع وقدامه زاد
ما استزاد
لكنك بطن، تاكل وتسرح في إمتداد
يحرِق جَنَاك،
أُختك، أَخوك
والبِشبَهوك
والجَرجَروك
يا مُغفّل، قصدهم أن يحرقوك
المهم، ليك أو لسِواك
جايّ الحساب
ودنا العذاب
خليك مُبرطِع في هَواك،
بالونَة هَواك
يوم تَنفِس ما في ليك غير الهلاك
كريمان زلفو
٣ يونيو ٢٠١٩م
No comments:
Post a Comment