في البدء كانت الكلمة: #تسقط_بس
إلى: الشفاه التي أبدعت ب {تسقط بس}
طبقات ود الثورة
طبقات، طبقات، طبقات
صُوتنا البَحَّ ومات
يا خَلق الله:
دي (البِستِلَّة)*،
فيها المَرَقَة
ودهْ (العامُود)*
كله قِدود
تَزِح الطبقة تَمرُق طبقة
أول واحدة:
فيها قُروش وكم من ورقة
تَحفِر تاني تلقي الدَرَقًة
الطبقة التالتة سَرَقَا،
لأ...حَرَقَا
الطبقة الرابعة فيها المُوس،
هَيْ!...حَلَقَا!
يا ناس الله:
و... هَلُمَّ جَرًّا
عُمَر الراح،
هَمْ واِنزاح
وما قال آخ
مُرَبِي مُراح
وراهُ أناخ
رِكِب جياشي
نَزَل (العوف)*،
برهان صُوف
خَطف (الشاشي)*
جا (زينكوف)*
لسان مولوتوف
سُحِب مَنتُوف
رِكِب كباشي،
ماشي وغاشّي
فُوقُم: تُوووف،
الزول الراشِي
راشِّي وراشِّي
حَتَّ الغاشي
وحَتَّ الماشي
يا عباد الله
عليكم الله
من دون جَرْ
نحنا نُصِرْ:
(لا للعكنَنَة،
لا للمسكَنَة
واضح لَرْ
واضح إننا،
محلك سرْ)!
خَلُوا البشتَنَة
جُمَلَ التَنتَنَة*
مافي مفرْ؟
خَلفَك دُرْ
وراك الحُرْ، بنات الحُرْ
يا خلق الله:
ال(بِستِلَّة)*،
والعامُود
سَكنُوا الحِلِّة
وشَدّوا الحَلَّة
وفتَّوا المَرَقَة
ونحنا نروح
(شَمَار في مَرَقَة)!
كريمان زلفو
١٦ يوليو ٢٠١٩م
*البِستِلَّة: إناء عميق بغطاء وله مقبض رفيع تُكب فيه المشروبات السودانية عند الزيارات والمجاملات،
*العامود: إناء من عدة أواني طبقات بعامودين جانبين يمسكان طبقات الأواني ويستعمل في زيارات المناسبات،
*العوف: إبن عوف،
*الشاشي: الشاشة المرئية،
*زينكوف: زين العابدين
*التنتنة: الزخرفة.
No comments:
Post a Comment