الثورة وين؟
وين...الثورة... وين؟
حايمة في شرايين الملايين
في سرادق كل بيت فَتَح البِكَا
في مصب (حَنفية) ل (إبريق) حزين
في (الدُشْ) بعد التعب من (لَستِكا)
في فَردَة الحَبوبَة أُم سِبحة وحنين
في بَخَة اللبن اللذيذ يوم جِرتِقَا
في طَرحتَا، في عِفَّتا لمدى السنين
في الفرع المخضِّر يوم تمايل وانِتَكا
في (الجينز) المَعفَر بالتُراب كايسلُهُ طين
في الصوت الودِر من الهتاف لا مَلَّ ولا شَكا
في (الخلايج) آلاف تَبقبِق نار صدورا، تَنِز أنين
في بلداً (خواجياً) قطن التلج تغسل دميعات من بَكا
في رنة من زغروتة قَدّت تَطفُل حَملقة وعين
وين...الثورة... وين؟
في الجلابية (المَكرفَسَة) وين الزمن (لمكوتَا)
محال ولا مجال ولا يُطال من هيبتا
في الصُرَة (المَلقدَمَة) تِحِت راس الصغير، كيف جَرَّتا
في التَوب المِجَرجِر، والعُفَار المَرَق من جِلدتا
في (إسكيرت) موسَّم بالعرق البَرَق من حُرقَتا
في (تي شيرت) بالخَتَة اِتلّمت قروشو الدفَعَتا
في (المِلاية) الهَبَ النسيم رَفرَف جناح لثورتا
وين الثورة... وين؟
في قمة مآذن في حلفا اِتلفّحَت دمعاً هميل
في عِروق الصخور (الخَربَشت) التاكا والتوتيل
في قُطية من قِشيشاتا (اِتمشّطت) بالليل
في تعاريج خط الحدود...الفي الجنوب اُغتيل
في النيل، وفي النيل، وفي النيل، وفي النيل
وين الثورة... وين؟
في (رُوبَك) الأبيض...تقدِل، تهرول أو تنوم أو تساهر
في ذَرّة من طَبشيرة هامت في فضاءات المنابر
في خازوق تَعذَّب من عِذابهُ لفكرة (بَلّورها ) العساكِر
في (خَشُم قِربتَنا) (سَكِّلي) (يا عَناقريب...يا بنَابِر)
في السُوط الكلامه يوم القيامة عِلا، تسكُت حناجر
في كَمَامَة من أزيز الصدر (لسِستر) تعافِر
في (مُقشاشَة) مُهترئة لعامل ذَلَّته رَشة مَسخ عابر
في الأربعينية (مِدنقِرة) تمسح بلاط لوفد زاير
وين الثورة... وين؟
في الإبرة أَبت دخول الخيط (لا مساس...لا مساس)
في الدقن المَنَتّفة...في الشعر اِتحلق...قايلنه فاس؟
فى الندبة العَمَلت شعار...حفرت جداول للغِراس
في الترانيم الوليدة...من (سقوط...لبس) فرهَد جناس
في زماني الإتولد (حَسِي)...في زمانك يا تراس
الثورة وين...الثورة وين؟
فيني، فيك، فيهم وفيهّن...ما من حدود خارج الوطن
الكلمة فيها (مَدردرَة) من جُوفي، من (جُوَّه) البطُن
وما عندي ظن...غير أنه إنت حبيبي يا أجمل وطن
كريمان زلفو
فجر 5 فبراير 2019
