في البدء كانت الكلمة: #تسقط_بس
إلى: الشفاه التي أبدعت ب {تسقط بس}
تغريدات...وبس!
جَزوا الرؤوس
دَسوا الفلوس
عَبوا الكؤوس
بدم العريس
جيبوا (البسوس)
ترقص تحوس
لنار مجوس
يا الفاتح:
(الله لا يفتحها عليك)
هندي أحمر بيرتديك
ريشاً ملون في عينيك
النار في ضجيج (القاعة)...جِهزت...
جابوها ليك
أرقص حوالينا...قبال...تاكلك تحتويك
وأنت يا خنجر في خصر شعبي المنطلق
إسماً ما مسمى على (علي)...إسمك...(نزق...فانزلق)
لغة العيون والجسد حقدا دفين إنطلق
الفرق بينك وبينه إنه إحترق
وجيتنا من كُوم رماده...بَرضه حتتحرق!
وانتوا...يا انتوا...
يا الهللتوا والكبرتوا...للصنم الأصم
والمجدتوا والنافقتوا
وفي الواطَة إتوهطتوا
تاكلوا من الرماه سيدكم يا سواد يومكم. ..
يا سواد ليلكم...
جاكم اليوم،
جاكم الشوم،
حارم النوم
كان قمتوا
أو ما قمتوا
ميزان الحساب في السَهَلة واقف لى سيدو كمان لى سِتّو
ما نسيتك...يا قارع الطبول للفتنة...
يا المارق (شمين)! و(يمال)!...راجل المهمة النتنة
بس...عشان رقصك الخلانا من الخجل دَنقرنا،
من الخجل مُتنا
ختيتك في النهاية...
وقرفانة من قول إسمك،
خوف سِمّك
يعكر من مزاج الطلعوا للشارع يفكوا المِحنة
وفي الختام
مختصر الكلام:
(جِزوا الرؤوس)
...نحنا الفؤوس!
(يا الفاتح)
...كان فالِح...أمرق ناطِح. ..!
(وإنت يا خنجر في خصر شعبي المنطلق)
...توارى...وإلا...تنسحق...
(وإنتوا... يا إنتوا)
...انتظروا يوم زي يوم داك...يوم ما كُنتوا ولا كُنتوا!
(ما نسيتك يا قارع الطبول للفتنة)
...بكرة الطبول تقلِب نحاس بالفطنة...
كريمان زلفو
13 يناير 2019
No comments:
Post a Comment