حَبوبتي أكتوبر
يا حَبوبتِي... يا أكتوبر
من بَعدِك المُرْ تَلاهُ المُرْ
بِتِّك أبريل إِترَمَّلت وأنا غر
كُنتَ يتيم ما دوداً بِقرقِر
ما بَسِر للسِر ومُتستِّر
سَقِف قُطّيتِك القَرقَر
كُلْ ما أشوفهُ لَي يِحدِر
ما إنتَ حُر وأبوك حُر
البِرِش لَتّكتُه بالخيط والإبَر
من عِلبتِك صَدَّت وفيها سِر
وكل ما ألَتِّك وِشِك يُبدِر
يا ولد قُوم خَلِي التِقِرقِر
حَبوبتي الحِنينة وما بَتنهَر
الليلة فَرقَّع كلامها دُوغري تَر
وفجأة...القُطّية إتكتمت بَشَر
أولاد الفَريق الفيهم إتحَكَّر
والعامل فَهَم في بِرشِك إتقنطَر
والبنات واقفات، عفاف وأُم سُر
وآدم خايف عليهن من هبوب الشر
من بعيد واقف يتململ ومُتكّدِر
شُفَتَ الشمس وِشِك نَفَر
قَبَّلتَ للعَنقَريب ما فيهُ نَفْر
ومن بعيد كَواريك بِت أم بَدُر
القُطّية زي عروس ترقص تَترتِر
من الطَاقَة عَاينَتَ..أوووك!
بحر البشر:
ماكْ حفيد أكتوبر...مَاكَا ديسمبر!
كريمان زلفو
٢١ أكتوبر ٢٠١٩م
No comments:
Post a Comment