فيا ليتنى أسميته نزارا

فيا ليتنى أسميته نزارا

فقد كنت ضمن قافلة مبهورة بشعرك الرقيق

وقد كان أن أسميته فراسا

بركب قافلة شعرها مدارا

وكان لى فى صباى ورقة وردية الرؤى

تمكنت من خلالها نيل توقيعك البريق

وأذكر الطريق

حين عودة من الخرطوم لام درمان  للفريق

قصيدة بيضاء شماء

أسميتها اللؤلؤة السوداء

فيا نزارا

كلنا لها بهول ما حدث

تيتمت حروفنا ... ترملت سطورنا

اكتأبت زهورنا

ورفضت ألف امرأة أن ترتدى السواد

بل تجملت كل امرأة بوردة فى خصلات شعرها

وضمخت أريجها بقطرة من المداد

تنحنى لك النخلات فى العراق

وتسكت الطرقات عن ضجيجها

تسكت الصبايا عن همس ليلها

وتنزع العطور من أريجها

تسكن الخرطوم لنومها فمن يقرأ لها

مخارج الحروف للفراق

لمقاهى بيروت توتر حزين ... رقصها أنين

مصابها جلل

وقاهرة دمعها يراق

ولدبى صمتها ... خبو سحرها

وأنا من عاصمة لعاصمة

عربية اللسان نزارية القبيلة

أطلق مسك حرفك البخور

وأسكن السطور

ف... نم قرير العين

كريمان "أم فراس" 1998

خطبة هبه

خطبة هبة

بسم الله ابتديت ... وعلى الرسول صليت

فيك بجر النم .. قبله الذكر

فلتذكرى

اتقدلى

بالتركواز خاطف اللون السماوى

أو قوس قزح

من فستقى

من اخضر

***

واتبهرجى

باللجين الشامخ والدهب المجمر والعقيق الأسمر

***

طالعة من صفا اليوم الولدتك فيه

يوما

رش فى الواطة مسك الدعاش

...أمطرى ... هى أمطرى

***

ما كنت يدى اليمين

فى يومى ده

بمد ليك اتنين

كان الفرض أقدر أنا وما تقدرى

***

اتحزمت ببر والدين

غضة وصغيرة شلت دين

ولليتيم

ما بتقهرى

وبتسترى

***

ما أصله أصل

جدك ورثت منه الدين والخلق الثرى

خالك حروف وسطور وتاريخ أنترى

عمك نظم وقصيد شعر ما تقصرى

ولمن أخوك سلك درب الصلاح

أفخرى وما تفترى

***

كان للكرم .. ديوان الرجال فى أم در زمان

أبوابه ما صدت صديق ما صدت قريب أو غريب للجار أمان

ما بتزدرى

***

عمتك فخر النساء

ما اتهيبت من قول حقيقة .. قامة نخيل

دربا طويل

كان دوروا التاريخ ، أوعى تدورى

***

أبوك أسلافه العلم

رفع القلم

ربى الرجال

أسس مقال

ما تختى هم ... ما تشيلى هم واتصبرى

***

جاتك حرم

بالحيل ودودة

أم قول جميل .. صفاء وريدة

ان زعلك ... تعالى لصدرى الحنون

أمرك هنا ... فلتأمرى

***

"طارق" طرق باب الديار

لا لف دار ... ولا واعد هظار

خاف  فى هبة ربك ..ان حبيتها عزيتها

وان لم .. أكرمتها

قال سمح

يا "بت زلفو" ما تهللى ما تكبرى

***

كالطاؤوس بشوفك ... هلة صباح

الزمرد عن يمينك شهد

عن شمالك برق الفرح من عين صلاح

فلتفرحى

واتبخترى

واسنترى

واتقنطرى

ماما

الشارقة:4/12/2009م

رنا

رنا يا رنا
آن الأوان للدندنة
العود والكمان ورقصة القلب الطروب
ممزوجة بصحبة غنا

يا بت حوش الرجال البابه تب ما انقفل
قمرا منور حاشا ضوا ما أفل
خيرا مترتر فى الفجر .. عز الضهر
عشا الليالى
جمر المناقد ما فتر

يا العلم المأصل من زمان
وارثاه من أسلافك الختوا القلم صمام أمان
ولموا استقامة مع الحنان
سترة .. وكرم .. عزة وشمم
مغروزة فى أعلى السنان

أمك رزينة أنيقة ما حدثت بقول
ما غلطت حق زول
دربك معاها عشرة وصداقة
صبرا تجمل بالبسيمات وصل للحول

أبوك الما رد طلبا للقريب وبعيد
ما كسر وعوده داقى سدره عنيد
فى الحارة .. أيد
والليله جاهو خبر الفرح والعيد

صالح أبشر ياجنا
دبله بتبرق ذى سنا
صالح ... بتنا رنا
خليها فى حدقاتك
وارنو
كلما يحلو لرنا

مبروك يا رنا
أسرجى بخيل الخيال للسما .. فوق النجوم
ملايكة الخير حولك تحوم
والمسك فايح عبيره يصبح سحاب
سقفا مغطى دارك هنا
صندل معتق ... بخوروغيوم


أمك كريمان... الشارقة ...
3/11/2009
...مهداة الى رنا  ابراهيم

يا حليل ويا حليل

يا حليلك يالسودان

ماشى لقدام ولا جاى ورا

رقصة عروس بالترترة

ومسنترة

حوش الجماعة أدونا ليهو ..

حوش سمح مش مسخرة

للمنظرة

وديك يالفلهمة

عربية من نوع الكروزر

متلزمة

ومتحزمة

جبناها ، بس جبناها أصلو العروس ما بترضى الا الكروزر" ..

قرضمة

وبى غادى..يالسودان

بيت العروس الأصلى .. مش نقلى

حيشانو زبالة من حيطان

.. متهردمة ومتسجمة

والبرش فارشنو فى الحيشان

.. أسمر مرقع هيل دراويش ..

ما هو نافع للرقيص

عاين تعال شوف البرش حق الرقيص

مستلفنو من طرف الزقاق هيل ناس كبار

متحكمة

وورا مناقد النسوان

ورا الصيوان

فتش معاى..

أسمر نحيل..

سامق طويل..

شدرة نخيل..ومنحنى ..

ضلو ..

هدوم حبل الغسيل

عرقو بيشرشر ..فت..فت..

ملطع بالزفت

خجلان

يطلع يشوفوهو ويقولو... عثمان

أختو العروس

قالتلو قبل الدخلة "دس رقشتك" خلى الفضايح

كان ماهو عاجبك..فوت للضبايح

ياأخوانا .. ده الضباح ، مو عثمان - يخلق من الشبه أربعين

و...عثمان كلفت كرامتو دمعو عجنو مع الزفت

والعرق صبر المهين

يا حليلك يالسودان

ساحة وبراحة وراحة يالفيلل الرئاسية

شارعك ظلط حدو البرارى ..

كان دنقرت يازول

وشك يرارى

والكوبرى من فوق فارد عضل

ياليل

... شاف حوض السباحة ال"ممنوع دخولو" الا لل.......الحكومية

وبيغادى بت عمى "الزكية" مستغربة ومتفلسفة

لزومو شنو؟

مش كان أحسن الردمة لخور الزقاق ..

بدل ما المويه تبقى ملاريا قادلة وحايمة وردية

نقول لمنوالمويه مقطوعه يا ناس الفريق...

وناس الفيلل خد يا مساج قبل السباحة ، ناقصات سرارى

الجاكوزى ما تنسوهو وما تشووا ..أهو الفنان

وبرضو زكية مصرة متعجبة ومتفلفسة

بس لو حلم ديك اللوارى

مرصرصة

سووا الدرب حدا بيتنا حصحاص..

غطوا المجارى

يا حليلك يالسودان

شوف الكهربه..

داخلة المزرعة.. حقت فلان

عامودها استفزازى كان عاجبك اتحكر تعال ذاكر هنا

..سد دى بطينة وصرخة أبوك بعجينة

قوم يا ولد أدفع .. العداد وصل زيرو

..لمنو بدفع أنا

-عارف يابا لى ... رتب أمورك أنجح شيلك معاى

- كم سنة ودورى جاى

..عيمود الكهربه محبط معاهو ..

ركز معاهو

هى يا وليد..

أحسن ليك..

أكسح بعيد

كندا..الدنمارك .."أوكى" الخليج ..

لا الخليج ما كان زمان

سوى جلدك ذى جلد تمساح

وخارج رقيبتك من شقا أمدرمان

و....آه..وأحى يالسودان..

كريمان زلفوالشارقة...

28 مايو 2007م

صراع

اذا تم "التقزم" فى الوجاهة والتعملق

وأنت مطلق

فى مساحات حدودية

... وهم التأرجح فى فضائية تألق

وهم "التبسط" فى العطائية ..

وحمل الهم ، غطرسة الترقرق

من لك يا صديق غير الحبل مشدودا الى طرف وأنت مشرق

من توهنه خلاصة وهمك الآتى بقبضات حديدية

تمازحها .. فيا قبضة حريرية

مر بها

در ظهرك لها

عجل بقسوتك الطريدة: أشواكها غاب العنود

لا تحنى رؤوس الود ، لا تجاملها ، أسكب وقود

أنت المؤهل للديار "هلا" أم ظهرا طريد؟

هل تستعيد؟

من كان لك ؟ غير "النهش فى جسد قدود

ما كان للجسد الوقور فى مرامى الروح غير الضوء غير السلم ، تبختره فى مسارب عالم نجما وليد

فيا وحيد

:أبحث عن الوجه الملازم للتردد فى خبايا مسربك

هل من مزيد؟

هل أنت "سيزيفا" وصخرته الوجل؟

هل من صليب حامله وحاملك؟

تصلبه ليصلبك ؟

كف عن تناوشك البدائى وأصرخ بملء الروح: من قتل ؟

صمتك بنبرته الودودة أم كلمة تردد فى محاجرها قوة مزلزل

!آه .. يا أنا

آه.. يا أنت

آه يا كلانا ..

من غيرنا مد السلام عفيفا لا طفيفا ثم طافا واستضافا ثم عافا أن يقول

ردوه عنى

ما سلمت بعفة لعوالم غرقت رعافا

كريمان زلفو

يونيو 2002م

اليها .. بعض من صدى الذات

الطير بيسامح لو كان جريح

كان عرف انه السهم طلقة خطا

الطير بيسامح لو كان ذبيح

وبيستريح

كان عرف فرخاته جاريه له بخطى

ضهر الوليف طعنه الوليف

والخطى ...

مجرجرة لبحر النزيف

فرفرن فيه الجناحات ... أبت تقيف

اتطاير الريش المنتف صار له قيف

أبت تقيف

اتكاتفن صاحبات ... الليل ظريف

القلوب مجذوعة ... مصرورة فى أنامل: الدور على ... ولا بيقيف

هفتانة مشتاقة لسنين

مدفونة فى عمقى المكين

واقفة لى شوكة فى حلق

شرقت حبا فى أفق

غربت عاينت المرق

آه من سبحته ... زمن اتنشل ولا انسرق

بصرخ ، حبال الصوت شديتها فى كمنجة ...

قعدت أنزف

والوتر الضعيف معاى بيرجف

سيمفونية: "ردوها السنين" ...

رغم الحنين ما حأنزف

أمرق سهم ذى النغم

ما هو راجع ما هو راكع

معاى كمنجة ولسه بعزف

كريمان زلفو

الشارقة ... 16 يوليو 2007م

البديل

أنت

ما زلت فى وهم الطريق

أنا

لا أطيق


أناملا كانت تلاحقنى بفيض من حريق


... تتبعنى ...


ولا أجد غير غيض من جليد ...

عار ... صفيق


أو ذرات من رمال مانعت صحراء الفها ...


فترنحت وتعلقت بجدارها

ذاك العتيق


***



... ترقبنى؟


مرقت سهما كالبريق


!لم ألتفت الى أمس الغد ... لم أرتقب غدك السحيق


!لم ألتمس قدرك لتسمو بى ... أنت الغريق


ولا اقتسمت مدى دهرا أجتر ذكرى ... حلما يضيق


كنت مخاطبا عقلا تشبث بالشجيرات القزم


أبصارها نخل له ثمر دفيق


الآن لى الكلم الوثيق


... لى الكلم الدقيق


لن تكون للدرب الرفيق


! " ولا هجاء منك لى " نعم الصديق

كريمان زلفو
الشارقة – 7/10/2008