الى حلم توأمة الروح حين صار حقيقة ثم ارتد حلما
أم الحسين فؤاد... لها المغفرة
أمونة... ست الشاي
"حي ووب"
جاياك عريانة من دون توب
"حي ووب"
ما تختي شاييك في المنقد
ختيه في جوفي المولع نار
أكان يسكت
وبالمقدار....خليه بوخ ...نصه السما...نصه الأرض
أنا في مرار
حلقة هوا متكية في الراكوبة
يا راكوبة
خليك ثابتة ورابطة
خلي الرجيف لستو...لروح ستو
أصله المعاك كان فتو
بصبح حداي
بصبح وراي
ما منكوبة...ما مسلوبة...ما مرعوبة
واي...واي
أمونة
أدفقي الشاي
لا لا ما تكبيه...خليه يا أمونة
أحمر مولع نار
كان درتي
بديك من دمي البيغلي ماهو غادي وماهو جاي
وكان نمت
جمر الصباح جواي
واي
ماهو الودار
أم الحسين
يا يمة
يا لمة
ما ادق ليك دنقر
سكلبت بالحاحاي
اتكسر البنبر
وين قعدتي
والقلدة بالعينين
الونسة والمبخر
وين قهوتي
حوش قلبك البراي
نور رمشتك ضواي
بتنفس العنبر
ماداهو لي في توبك القادل وما سادل معاي راحل
ولي كساي
أمونة...كبي الشاي
اتوهطي الواطة
أقعدي معاي
سامعاني أمونة؟
يا مجنونة خلي الشاي
جاياك في الحولية
فد عامود...فد ترمس وفي الصينية
فد كوز موية
ويلاك النزور أمي
وبالميزان
برش الموية من كوزك...بخضر طوبتها
واخت براي في حجرك عشان اقدر أشيل قرآن
وبمشي معاك لأهلك
وأنوم في حبلك الضافراه بعرقك
وأمد دمعي
بصير - مقرن - مملح بتعب أمونة
واللولاي
نقوم فجر السماي
تتكلي لشاييك
ولي مركب شراعها موجهو الرحمن
كريمان زلفو
فبراير 2003م
No comments:
Post a Comment